Во Основниот суд Скопје 1 Скопје, денеска се одржа првото рочиште за нападот на новинарската екипа на „А1 он“, кој се случи на 28 февруари минатата година за време на протестот „За заедничка Македонија“ кога новинарот Александар Тодески и снимателот Владимир Желчески се здобија со телесни повреди и потрес на мозокот по физичкиот напад кај портата „Македонија“.
Според обвинението што е поведено од страна на Јавното обвинителство, обвинетиот Матеја Каников, заедно со уште едно, засега непознато лице, на 28 февруари минатата година, втор ден од протестот „За заедничка Македонија“, пред самиот крај на демонстрациите, веднаш до триумфалната порта во Центар физички ги нападнал оштетените Тодески и Желчески, кои во тој момент биле наведнати кон земјата и ги снимале испечатените пари со албански знаменитости, кои претходно биле фрлени од страна на демонстрантите.
Обвинетиот Каников, кој работел како комунален редар во Град Скопје рече дека не се чувствува виновен.
Новинарот и снимателот сведочеа дека во близина на портата „Македонија“ им пришле неколку лица кои побарале од нив да се легитимираат. Откако Тодески одбил бидејќи не биле службени лица тие веднаш биле нападнати, а напаѓачите се упатиле кон Градскиот трговски центар, каде се снимени од безбедносните камери. На местото на настанот, како што тие сведочеа бил и тогашниот министер за финансии, Кирил Миновски заедно со негов пријател, но кога се обиделе да земат изјава од него, тој се повлекол.
Второто лице кое било заедно со Каников, носи капуљача и не се гледа неговиот лик.
Нападнатата екипа исто така кажа дека полицијата не тргнала во потрага по напаѓачите.
Новото рочиште е закажано за 23 мај, кога ќе се презентираат доказите и ќе се сослушаат сведоци.