Основното јавно обвинителство соопштува дека отворена е истрага за невестата од Битола која за време на нејзината свадба пукала со пушка.
-По написите во повеќе медиуми во кои се пишува за свадбената веселба на која е употребено оружје, како и за други настани на кои истото оружје е користено и каде има индиции и за евентуално сторени кривични дела, а во насока на информирање на јавноста, јавното обвинителство потенцира дека за овие настани веќе има отворено предмет пред неколку дена.
Во насока на расветлување на настаните и утврдување на поседувањето, употребата на оружјето, како и можно вршење на други кривични дела, обвинителството презема дејствија, меѓу кои е и испратена Наредба до Министерството за внатрешни работи за натамошно постапување, се вели во соопштението.
Како што пред неколку дена објави СДСМ, се работи за Марија Ристовска Калешковска – секретарка на началник во СВР Битола.
Според опозицијата, невестата на свадба употребила формациско оружје на полицијата и војската и за неа граѓаните не можат да добијат дозвола за поседување и носење.
– Но тоа очигледно не важи за нововработената секретарка на началникот на униформираната полиција во СВР Битола, Зоран Дуковски. Според информациите што ги имаме, Марија Ристовска Калешковска е тазе вработена, пред извесно време добила и решение за работа во СВР Битола, веднаш по завршувањето на средното економско училиште, рече потпретседателот на СДММ Дарко Каевски.
По објавување ан написите во медиумите, семејството на невестата се огласи на социјалните мрежи, со тврдење дека пушката е во сопственост на таткото на невестата и дека во пушката немало куршуми туку огномет.