По објавеното интервју на извесен Стефан Лазаров со Драган Павловиќ – Латас, кое предизвика реакции во јавноста, обвинителството отворило предмет за некои од наводите во интервјуто во делот каде што Павловиќ раскажува дека како 15-годишник тој и неколку другари имале сексуален однос со девојка а која била тепана.
Според порталот СДК, Секторот за компјутерски криминал од МВР доставил известување до Скопското обвинителство по интервјуто. Јавниот обвинител Гаврил Бубевски на поставено прашање од СДК.мк вели дека предметот е распореден кај обвинител.
За интервјуто своја реакција објавија и од Хелсиншкиот комитет, во која велат дека интервјуто е колективен, општествен пораз и реален приказ за тоа како ги третираме жените жртви на насилство.
„Ова интервју е само еден јавен и болен показател за тоа како во пракса изгледа нормализирање на културата на насилство“, се вели во реакцијата од Хелсиншкиот комитет.
„За двајцата соговорници силувањето е извор на забава и смеа, со што тие директно праќаат порака кон огромната публика не само дека тоа е нешто нормално, туку и смешно. Ова интервју е само еден јавен и болен показател за тоа како во пракса изгледа нормализирање на културата на насилство и до каде може може да доведе непостапувањето на институциите и немањето јасни ставови и политики кои ги заштитуваат жртвите, наместо насилниците“, се вели во реакцијата.
Стефан Лазаров е македонски влогер со над 75.000 следбеници на платформата Јутјуб. По бројните реакции за интервјуто објавено на неговиот Јутјуб канал, Лазаров објави и свој став, но набрзо го избриша.