Јавното обвинителството за организиран криминал и корупција следната година ќе се пресели во зградата на Државниот архив. Ова обвинителство со години е сместено во објектот на Апелациониот суд, а новата локација е на само 50 метри од судот.
Обвинителството на јавен оглас ангажираше градежна фирма која ќе им го уреди и реконструира објектот на Архивот, кој сега е префрлен во нова зграда од проектот Скопје 2014 покрај кејот на Вардар.
За градежните работи е ангажирана компанијата Бауер БГ од Скопје, која за зделката ќе добие 640.000 евра, а рокот за изведба е една година. Според имотниот лист, објектот на Архивот е во државна сопственост и има 1314 м2 простор и двор од 7565 м2.
Од прес службата на Државното јавното обвинителство за НОВА потврдија дека е склучен договор со фирмата Бауер и велат дека зградата на Државниот архив му била доделена на Обвинителството за организиран криминал уште од 2012 година. Оттаму ги наведоа и причините за преселбата на обвинителството со кое раководи Јован Илиевски, баџанак на екс директорот на УБК Сашо Мијалков.
„Основното јавно обвинителство за гонење на организиран криминал и корупција во моментов користи простории во зградата на Апелациониот суд – Скопје, кои ни од далеку не ги задоволуваат ниту просторните ниту техничките услови за работа на ова обвинителство. Токму затоа, Владата на Република Македонија со одлука бр.41-874/2 од 21.02.2012 година на Основното јавно обвинителство за гонење на организиран криминал и корупција му ја додели во трајно користење поранешната зграда на Државниот архив на Република Македонија. Сепак, специфичната работа на ова обвинителство, како и зголемените надлежности согласно новиот Закон за кривична постапка, налагаат просторна адаптација и материјално-техничко опремување на истата.“, соопштија за НОВА од Јавното обвинителство на РМ.
Новата зграда на Републичкото јавното обвинителството на чие чело е Марко Зврлевски беше пуштена во употреба во 2013 година. Во него се сместени Основното и Вишото јавно обвинителство -Скопје како и Јавното обвинителство на Република Македонија. Објектот чини 13 милиони евра и е дел од проектот Скопје 2014.