Основното јавно обвинителство за гонење на организиран криминал и корупција води истрага за шест фирми кои продаваат или произведуваат ортопедски помагала, потврдија за НОВА од ОЈО. Истрагата се води откако Обвинителството примило кривична пријава од Фондот за здравствено осигурување заради откриени неправилности и прекршување на договорите во однос на издавањето на ортопедските помагала. Повеќе детали за истрагата од обвинителството не откриваат.
Како што објави НОВА, Фондот за здравство ги раскинал договорите со шест ортопедски куќи откако контролорите утврдиле неправилности при редовна контрола на системот на издавање на ортопедски помагала.
„Податоците од контролата, како и утврдените неправилности во овие постапки, поради одредени сомненија, беа доставени до надлежното јавно обвинителство и други надлежни органи“, велат од ФЗО.
По ова, ФЗО склучил договор со нови 91 правни субјекти кои имаат 332 аптеки, односно продажни места за одредени видови ортопедски помагала на територија на целата држава. Почнувајќи од 31 октомври, ортопедски помагала како што се инвалидски колички, вештачки колкови, протези за раце и нозе, пелени за болните, се набавуваат во аптеките наместо во специјализираните фирми кои ги продаваат или ги произведуваат. Тоа предизвика хаос и револт кај пациентите бидејќи, како што велат, во аптеките ниту знаат ниту има услови да им земаат мерка за протезите.