Од 1 септември ќе почне со работа Центарот за ран детски развој во село Тркање, Кочанско. Во Центарот кој е во состав на детската градинка „Павлина Велјанова“ ќе бидат сместени 20 деца, по три часа секој работен ден. Згрижувањето ќе биде бесплатно.
„Навистина ми е драго што овој центар во Тркање е во рурална средина и ги прави последните подготовки за отпочнување со работа. Од она што можев да го видам, обезбедени се соодветни услови, опрема и дидактички средства, соодветен кадар како програма за вршење на дејноста. Центарот е наменет за деца на возраст од 3 до 6 години и ги повикувам родителите од селото да ги запишат децата за да може да
започнат да ја следат програмата од септември“, рече министерката за труд Мила Царовска која денеска го посети Центарот.
Таа додаде дека Кочани е и една од првите 4 општини која ќе гради нова градинка за над 100 деца со грант од Светска банка, за што минатата недела беа потпишани договори.
„Министерството за труд и социјална политика продолжува да инвестира во раниот детски развој со отворање на нови градинки и центри за ран детски развој, проширување и опремување на постојните објекти, но и со јакнење на професионалните компетенции на кадарот што работи со децата“, рече Царовска.
Oд мај 2017 до мај годинава МТСП инвестираше во изградба, реконструкција и опремување на вкупно 31 објект за детска заштита.