Од 20121 година пред секое ваше патување во некоја од земјите членки на Шенген зоната, ќе треба да побарате одобрување за да тргнете на пат. Ова ново правило се однесува на сите земји што не се членки на ЕУ а се ослободени од визи, помеѓу кои и Македонија.
Ваков договор денес постигнаа земјите членки на ЕУ и Европскиот парламент. А идејата стаса од Германија и Франција. Нивните министри за внатрешни работи го најавија системот уште на 23 август 2016 година.
«Со ова ќе знаеме кои лица влегуваат во ЕУ пред тие да стасаат на границата и со тоа ќе можеме да ги сопреме тие што се закана за нашите граѓани», изјави денес бугарскиот министер за внатрешни работи Валентин Радев, претседавач на Советот на министрите на ЕУ во овој прв семестар на оваа година.
Овој нов систем го доби името ЕТИАС (European Union Travel Information and Autorisation System) а ЕУ беше инспирана од американскиот систем ЕСТА кој во САД се применува од 2009 година. ЕТИАС ќе дозволи контрола на околу 40 милиони патници од над 60 земји чии што граѓани во ЕУ патуваат без виза.
Патниците од овие земји, помеѓу кои и Македонија, ќе треба да пополнат формулар на интернет со нивните лични податоци и да платат 7 евра. Потоа формуларот ќе биде разгледан во канцелариите на ЕТИАС што ќе постојат во секоја земја членка на Шенген. Истовремено формуларот го добива и Интерпол кој веднаш го проверува со својата база на податоци.
Доколку едно лице се смета ризично во поглед на безбедноста, доколку станува збор за нелегална миграција или постои ризик од епидемија, на тоа лице ќе му биде одбиен престојот во Шенген зоната. Лицето ќе биде известено за причините за одбивањето и неговото право на жалба.
Одобрувањето или одбивањето ќе бидат испратени најдоцна 96 часа по испраќањето на барањето за престој во Шенген зоната.
Авио превозниците како и бродскиот транспорт ќе мораат на проверуваат дали нивните патници поседуваат зелено светло за влез во Шенген.
Шефот на македонската дипломатија Никола Димитров во октомври 2017 година најави дека ќе разговара со сите негови колеги од регионот, чии земји се засегнати од новата мерка на Европската унија за воведување такса за влез на граѓаните на балканските земји кои имаат безвизен режим, за да се најде заеднички пристап кон ова прашање.