Клупски ангажман за селекторот на младата фудбалска репрезентација на Македонија. Благоја Милевски од денеска е нов тренер на израелскиот прволигаш, Ашдод. Човекот кој го направи најголемиот успех со националниот тим У21 (пласман на ЕП 2017) го наследува Јоси Мизрахи во екипата во чиј дрес настапуваше од 2001 година до 2004 година. Ашдод е формиран во 1999 година, а Милевски е само втор странец како предводник во историјата на популарните „делфини“ по Џон Грегори (1 јули во 2010 година – 18 април во 2011 година).
Во трите години минати во Ашдод, Милевски забележа 80 настапи што ги круниса со три гола. Од странските дестинации во неговото досие како активен фудбалер стојат и Панилиакос, Трикала и Ираклис во Грција и Марибор во Словенија. Во домашната сцена настапуваше за Македонија Ѓорче Петров во два наврата, за Цементарница 55 и за Победа. За сениорската репрезентација на Македонија има еден настап.
Тренерската кариера ја започна во Вардар како асистент на Илчо Ѓорѓиоски, а по неговото заминување на претседателската позиција во Фудбалската федерација на Македонија (ФФМ), Милевски ја доби довербата за самостојно водење на „црвено-црните“. На клупата на вардарци се задржа две години (2012 – 2014), период во кој освои по една шампионска титула во првенство и во Суперкупот пред да ја преземе младата селекција на Македонија.