Спиновите на Мицкоски, кои имаа за цел да внесат страв и паника кај народот, само уште еднаш потврдија зошто тој во Брисел е означен како дезинформатор.
Во студија на Европскиот парламент, фејсбук профилот на претседателот на ВМРО-ДПМНЕ, Христијан Мицкоски беше посочен како дезинформациски канал, заедно со оној на неговиот претходник во партиската фотелја, Никола Груевски. Студијата беше изработена од страна на Генералниот директорат за надворешна политика на ЕУ по нарачка на Европскиот парламент, а го опфаќаше периодот на ковид-пандемијата, вклучувајќи ја и кампањата за референдумот. Но, доколку ваква студија денес повторно се направи, по се изгледа Мицкоски ќе ја задржи позицијата, анализирајќи ги барем неговите изјави поврзани со електричната енергија.
Мицкоски на 26 август 2022 година, на својот фејбук профил напиша дека „заклучно со јуни 2022 година, граѓаните плаќаа 5,87 денари за киловат час или за околу 32 отсто поскапа струја од времето кога јас бев разрешен од местото генерален директор на ЕЛЕМ, после последното поскапување од 1 јули оваа година, граѓаните плаќаат за повеќе од 50 проценти поскапа струја, а стопанството, поточно компаниите за 400 отсто поскапа струја“.
Потоа, на 29 јуни лани, во гостување на Сител телевизија, одново спомена дека се покачува цената на електричната енергија и тоа, ,според неговите проценки, за 17 до 18 проценти.
– Процентот ќе биде помеѓу 17 и 18, и тоа ќе го почувствуваат граѓаните во сметките. Цената на струјата која ја плаќаат домаќинствата се формира по три основи – цената која се исплаќа кон поранешно ЕЛЕМ денешно ЕСМ, потоа цената која се исплаќа кон МЕПСО за пренос и пазар и цената до дистрибутерот, а тоа е ЕВН – рече тогаш Мицкоски.
Тој на почетокот на септември изјави дека Владата рагледувала и опции за рестрикција на струја. Иако ваквите негови ставови не беа потврдени, веќе наредниот месец тој рече дека состојбата е алармантна и со почетокот на грејната сезона електро – енергетскиот систем во Македонија ќе биде сериозно оптоварен поради потребите на граѓаните и стопанството. Мицкоски овојпат нагласи дека рестрикции во земјава ќе има, а дека дополнително тоа се планирало и за енергетските компании.
– Од она што го имам како информација е дека се подготвува и во енергетските компании план за рестрикции. Не знам колку е тоа вистина, но таа информација дојде до мене. Значи се враќаме 30-40 години назад во времето, со оваа Влада на СДСМ се е можно, вклучително и рестрикции и враќање назад – рече Мицкоски.
Во интервју за МРТ, лидерот на опозицијата истакна дека „би било навистина срамота ако во 21 век во Европа земја кандидат за членство во Европската унија во услови на вака развиена дистрибутивна преносна мрежа има рестрикции“. Тој исто така додаде дека граѓаните и компаниите ќе плаќаат многу повисоки сметки поради тоа што власта ќе започне да увезува струја од соседството.
Тој ја заокружи годината со интервју за порталот „Вечер“ на 28 декември, во кое истакна дека „за домаќинствата цената на струјата ќе е поголема за 20%“.
Ваквите најави и тврдења на претседателот на ВМРО-ДПМНЕ паднаа во вода, односно рестрикции нема, а цената на струјата за дел од домаќинствата дополнително беше и намалена преку користењето на блок-тарифите. Од јануари годинава, откако во сила е новата цена на електричната енергија продолжува трендот на рационално користење на електричната енергија. Според пресметките на Регулаторната комисија за енергетика во јануари потрошувачката на домаќинствата е намалена 14% и властите очекуваат од јули да се намали цената на електричната енергија за потрошувачите пред се поради зголеменото домашно производство и заштедата на електрична енергија, наспроти ставовите на Мицкоски дека ќе се увезува струја од соседството.
Дополнително, според податоците, за околу 70.000 мали компании на регулираниот пазар цената на струјата е намалена, а 99,2 проценти од домаќинствата немаат зголемени цени на електрична енергија.
Со сите овие спинови, кои имаа за цел да внесат страв и паника кај народот, само уште еднаш потврдија зошто Мицковски од Брисел е означен како дезинформатор.
Извор: Рацин.мк