Режисерот на македонскиот долгометражен игран филм „Златна петорка“ Горан Тренчовски и продуцентот Дејан Милошевски денеска на прес-конференција реагираа на одлуката на Комисијата на Друштвото на филмски работници Македонија да нема претставник за Оскарот и најавија покренување судска постапка.
Одлуката, како што појаснија, не ја признаваат и сметаат дека зад тоа постојат други задни намери.
– Се чувствуваме оштетени, длабоко повредени и за таа повреда, нанесена штета, за угледот и за сите моменти кои се случуваат кон продукцијата и кон филмот, кон понатамошната продукција и моето присуство како режисер ќе бидат гонети по судска постапка, истакна Тренчовски.
Според него, вистинската причина за спречувањето за номинација на филмот „Златна петорка“ не е квалитетот на филмот туку, како што рече од „идеолошка причина“ и „обидот за нанесување лична штета“ за да не добие поддршка за неговиот следен долгометражен игран филм.
Ниту еден од двата македонски филма не може да биде кандидат за Оскар
Режисерот Тренчовски информира дека минатата недела имале средба со премиерот Зоран Заев, а оваа недела ќе се сретнат со претседателот Иванов, со министерот за култура Алаѓозовски и со претставници од амбасадите.