Премиерот Зоран Заев денеска пристигна во Основниот суд Скопје 1 на рочиштето за предметот „Поткуп“. Тој прв пат како премиер се појавува на судско рочиште. Станува збор за предмет во кој премиерот Заев е обвинет дека како градоначалник на Струмица побарал поткуп од бизнисменот Иван Николов Сачевалиев, во вредност од 160 илјади евра за градежно земјиште во Струмица.
Заев побара рочиштето да заврши до 12 часот, со оглед на тоа што има седница на Владата.
Адвокатот, Филип Медарски побара да бидат отфрлени доказите од посебните истражни мерки кои се веќе објавени, а биле службена тајна. Според него, снимките ги објавило лице кое имало контакт со нив со што сторило кривично дело објавување на службена тајна.
Последното рочиште беше одложено поради средба на Заев со претставници на ОБСЕ, за случувањата во Собранието на 27 април. Претходно неговата одбрана побара од судот препис на доказите од предметот. Односно од обвинителство бараа да ги добијат копиите од наредбите за посебните истражни мерки за следење на Заев.