Односите меѓу Бугарија и Македонија биле заладени, исклучиво од политички причини, рече премиерот Зоран Заев по завршувањето на денешните средби со бугарските колеги.
На прашање на бугарските новинари, тој повтори дека голем дел од историјата е заедничка, и дека во македонските учебници ќе биде променето се што не е во новиот дух на соработка. Тој рече дека чиј бил Цар Самоил не треба да дебатираат политичарите, туку историчарите.
Вчера Заев се сретна со својот бугарски колега, Бојко Борисов, а попладнето имаше средба со претседателот Румен Радев. На средбата со Борисов, Заев доби поддршка и помош за Македонија на патот кон интегрирањето во ЕУ и НАТО, договорија потпишување на договор за добрососедство, што според најавите, треба да се случи на заедничкото чествување на Илинден во Македонија.
Борисов рече дека договорот за добрососедство ќе биде потпишан на македонски и на бугарски јазик.