Денеска од пладне магистралниот пат А3 с.Крупиште према Штип поради чистење на снег, ќе биде затворен за сообраќај во времетраење од околу 30 минути, инфоримираат од Авто мото сојузот на Македонија (АМСМ). Прекини во сообраќајот има кон патиштата кон селата Герман, Гошинце и Алешевце, а поради наноси од снег во прекин е сообраќајот на патниот правец Прилеп – Витолиште. Тешко е движењето на возила на патот Куманово – Крива Паланка поради големите наноси на снег.
Забраната за сообраќај на тешки товарни возила на патниот правец Кочани – граничен превој Делчево е укината, додека патот во правец Св. Николе-Куманово којшто изминатите два дена беше во прекин поради снегот сега е отворен за сообраќај за сите видови возила. Од АМСМ јавуваатт дека преминот Плетвар во Прилеп останува затворен за тешки товарни возила.
АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е почеста појава на одрони, особено на патните правци: Кочани -Мак. Каменица – Делчево, Виница – Берово, Гостивар – Стража, Маврово – Дебар – Струга, Д. Капија – Удово, Катланово – Велес, Крушево – Демир Хисар и Ресен – Буково.