Советот на Агенцијата за аудио и аудиовизуелни медиумски услуги (ААВМУ) на својата вчерашна седница ја одзеде дозволата за емитување на радиото „Слободна Македонија“.
Одлуката беше донесена едногласно. Претседателот на Советот, Лазо Петрушевски, рече дека медиумот има опција по судски пат да ја продолжи битката. Тој изрази жалење за вработените, кои како што рече, сигурно веќе подолго време се без работа.
ААВМУ претходно по извршен вонреден надзор констатираше дека оваа радиодифузна куќа повеќе не ги исполнува минималните кадровски услови за добивање дозвола за радио и телевизиско емитување.
Лиценцата на оваа радио станица е одземена поради не исполнување на условите од правилникот за минимални технички, просторни, финансиски и кадровски услови, односно во делот на исполнување на кадровските услови, поради недоволен број на вработени лица.
Во медиумот подолго време нема никаква активности, а канцелариите веќе неколку месеци се затворени.
Агенцијата за аудио и аудиовизуелни медиумски услуги на крајот на април најави дека ќе започне постапка за одземање на концесијата на Радио Слободна Македонија.
Во Извештајот што е објавен на интернет страницата на АВМУ од контролата во Трговското радиодифузно друштво Радио Слободна Македонија ДООЕЛ Скопје било утврдено дека не се исполнети минималните кадровски услови утврдени со Правилникот за минимални технички, просторни, финансики и кадровски услови за добивање дозвола за радио и телевизиско емитување.
Радио Слободна Македонија почна со работа на 11 декември 2013 година.
На ова радио свои емисии имаа Миленко Неделковски, авторот на „Јади бурек“ Јанко Илковски, поранешниот вицепремиер Ивица Боцевски и уредници во неколку национални телевизии кои беа блиски до режимот на Груевски.