Утре вечер, во 20 часот во Домот на културата „Григор Прличев“ во Охрид ќе бидат промовирани „Избраните дела“ во пет тома од истакнатиот македонски поет, есеист, литературен критичар, преведувач и издавач Тодор Чаловски, што како засебен комплет првпат беа промовирани на годишниот саем на книгата што се одржи во април годинава.
Oвој издавачки проект го реализира “Галикул„ од Скопје, а обемниот предговор кон изданието е на писателот Венко Андоновски.
Во првиот том со наслов „Поезија“ се содржани стихови од досега публикуваните дванаесет поетски книги на Чаловски, а вториот донесува есеистичко – критички текстови од богатата творечка актива на авторот, третиот е насловен како „Преводи и препеви“, а четвртиот донесува вредни книжевни разговори со истакнати македонски и странски писатели од Михаил Петрушевски, Славко Јаневски, Блаже Конески, Ацо Шопов, Матеја Матевски, Гане Тодоровски, Анте Поповски, Петре М. Андреевски, Виктор Шкловски, Рафаел Алберти, Вилем Завада, Оскар Давичо, Томас Шапкот и други.
Петтиот том со наслов „Толкувања“ за книжевниот опус на Тодор Чаловски донесува над педесетина извонредно есеистичко – критички обраќања кон слоевитото и бележито дело на овој наш совтремен автор. Промотор на „Избраните дела“ на Чаловски е проф. Димитар Пандев, чиј исказ ќе биде придружен со соодветен поетско – музички настап.