Основното јавно обвинителство за гонење на организиран криминал и корупција до Основниот суд Скопје 1 – Скопје денеска достави барање за продолжување на мерките притвор и куќен притвор за триесет и петмината осомничени за насилствата од 27 април 2017 година во Собранието.
Во соопштението од ОЈО се наведува дека надлежниот обвинител побара од судот за пратеничката Жаклина Пешевска да биде укината мерката куќен притвор и таа да биде заменета со мерки на претпазливост, а за Игор Дурловски мерката притвор да биде заменета со мерка – куќен притвор.
Основното јавно обвинителство за гонење на организиран криминал и корупција побара замена на мерката „притвор“ со „куќен притвор“ и за Елена Доцевска-Божиновска, вработена во Собранието на Република Македонија.
За останатите осомничени лица обвинителството останува на барањето за продолжување на претходно изречените мерки за обезбедување на присуство и за непречено водење на кривичната постапка.