Основното јавно обвинителство го назначи Анел Фидовски за нов обвинител кој ќе го води предметот за случајот Тамара, откако барањето на oбвинителката Наташа Гоџоска да биде изземена од предметот било прифатено. Од ОЈО за НОВА тврдат дека преметот ќе продолжи понатаму со ист интензитет и дека не станува збор за никакви притисоци, туку за приватна причина која се појавила како нов момент и може да го доведе во ризик целиот процес.
“Настанаа нови околности, се појави приватна причина поради која може да се побие целата постапка понатаму. Поради тоа обвинителката Гоџоска побара да биде изземена од предметот и сметаме дека постапи многу професионално за да не го доведе во ризик целиот процес“, велат за НОВА од службата за односи со јавност во ОЈО.
Од ОЈО не откриваат детали за што точно се работи но, велат дека новите околности може да сметаат на самата постапка поради што е прифатено барањето за изземање на обвинителката од предметот.
Откако на последното рочиште не се појави обвинителката Наташа Гоџоска која од судот побарала да биде изземена од предметот, а судењето беше одложено реагираа мајката на малата Тамара, Жаклина Димовска и Хелсиншкиот комитет.
„Ова е шок за мене, на половина судење се повлекува обвинителката. По втор пат ми го погребаа детето“, изјави за НОВА, Жаклина Димовска мајка на Тамара.
Реагираа и од Хелсиншки комитет за човекови права од каде сметаат дека развлекувањето на случајот Тамара создава сомнеж за несовесно водење на постапката. Од Хелсиншки комитет најавија дека ќе поднесат официјално барање до ОЈО за да ги образложат причините за изземање на обвинителката.
„По вчерашното повторно одложување на рочиштето, овој пат поради поднесено барање за изземање на јавната обвинителка, како и поради неговото целокупно развлекување, се јавува сомнеж за несовесно водење на постапката која досега требаше да биде завршена. Затоа, го повикуваме Основното јавно обвинителство да ги образложи причините за изземање на обвинителката, за што Хелсиншкиот комитет ќе поднесе и официјално барање. Воедно напоменуваме дека правната сигурност може да се обезбеди само со утврдување на одговорност на сите чинители со цел задоволување на кривичната правда“, се вели во ракцијата.
Хелсиншкиот комитет, заедно со мајката на Тамара поднесоа кривична пријава за сторено кривично дело – Несовесно работење во службата од член 353 од Кривичниот законик.
Од тогаш поминаа 5 години, а предметот се уште не е завршен. Од Хелсиншки реагираат и на долгото водење на предистражната постапка.
„Првото рочиште по овој предмет беше закажано дури во јуни 2018 година. Од тогаш закажани се 19 рочишта, од кои дури 8 се одложени поради различни причини. Дополнително одолговлекување во текот на постапката настапи и поради пречекорување на рокот од 90 дена помеѓу одржување на две рочишта, во кој случај, согласно закон, главната расправа мора одново да почне и сите докази мора повторно да се изведат“, велат од Хелсиншки комитет.
Ова е првпат рочиште да биде одложено на барање на Обвинителството. Следното рочиште е закажано за 30 октомври.
За несовесно работење во службата обвинети се 12 лица – доктори и членови на првостепенета и второстепенета комисија кои го донеле и потврдиле негативното решение за лекување во странство на Тамара.
Обвинети се и двајцата тогашни директори на Фондот за здравствено осигурување и претседателот на Управниот одбор на ФЗО. Тие се обвинети за несовесно работење во службата.
Деветгодишната Тамара Димовска почина на 9 февруари 2015 чекајќи операција на рбетот во странство.
Првостепената лекарска комисија за одлучување по правото на лекување во странство, се наведува во обвинителниот акт, го донела првичното негативно мислење за лекувањето на Тамара Димовска.
Комисијата, спротивно на Стручниот конзилиум на Универзитетската клиника ТОАРИЛУЦ, а по истекот на законски предвидениот рок донела мислење дека не се исцрпени можностите за лекување на пациентот во Македонија.