Надлежен јавен обвинител од Основното јавно обвинителство Скопје денеска до Основниот кривичен суд Скопје поднесе Обвинителен акт против три лица и Обвинителен предлог против 10 лица кои биле инволвирани во продажбата на објект во с. Ижишта, Општина Македонски Брод што го користела општина Пласница.
По предметот, во јавноста познат како „Моќник“, пред неговото преземање од Основното јавно обвинителство Скопје, постапуваше Јавното обвинителство за гонење на кривични дела поврзани и кои произлегуваат од соджината на незаконското следење на комуникациите.
„Со Обвинителниот акт, прво и второобвинетиот се товарат дека сториле едно кривично дело – Измама од член 247 став 4 во врска со став 1 во врска со член 22, третообвинетиот дека сторил едно кривично дело – Измама од член 247 став 4 во врска со став 1 во врска со член 22 и едно кривично дело – Злоупотреба на службената положба и овластување од член 353 став 2 во врска со став 1 во врска со член 23 од Кривичниот законик“, се вели во соопштението на Основното јавно обвинителство Скопје.
Десетте лица опфатени со Обвинителниот предлог се товарат дека сториле едно кривично дело – Злоупотреба на службената положба и овластување од член 353 став 2 во врска со став 1 во врска со член 22 од Кривичниот законик.
Истрагата во случајот „Моќник“ се водеше против 13 лица, а сомнежот се однесува на сторена штета од околу 50.000 евра. Во случајот, меѓу другите, се осомничени тогашен пратеник, неговиот татко и градоначалникот на општината Македонски Брод.
Второосомничениот, односно таткото на пратеникот, побарал да го купи задружниот дом во с. Ижиште, во општина Македонски Брод за да отвори сопствен бизнис, по што градоначалникот на Македонски Брод на советот на општината му предложил да се продаде објектот, иако знаел дека всушност се продава зградата во која е сместена администрацијата и градоначалникот на општина Пласница.
Огласот, како што истакна обвинителката Фатиме Фетаи, не бил објавен во „Службен весник“, па како понудувач се јавил само таткото на пратеникот, кој го знаел датумот и го купил објектот за 1.795.800 милиони денари, односно само 670 денари повеќе од почетната цена.
Со анекс го купил и земјиштето за 100 денари по квадратен метар, иако таму цената била по 400 денари за квадратен метар.
Пратеникот знаејќи дека градоначалникот на Пласница има близок судија во Кичево, како претседател на собраниската Комисија за надворешна политика, побарал листрација на судијата. Лустрациска, според СЈО, донела нарачана одлука и го лустрирала, а судијата најпрво бил времено оддалечен од функцијата, а потоа Судскиот совет и трајно му ја одзел функцијата.
Меѓу осомничените во оваа истрага има и членови на Комисијата за лустрација.