Родителите ги заклучиле децата и заминале во продавница, а за тоа време, од засега непознати причини, избувнал пожар и за кратко време ја зафатил куќата во која денеска животот го загубија три малолетни деца, соопштија од Јавното обвинителство на Република Македонија, во врска со вчерашниот пожар во Велес, во кој изгореа три малолетни деца од 1, 2 и 4 години.
Ова се наодите на јавниот обвинител од Основното јавно обвинителство Велес кој вчера попладне извршил увид на местото на трагедијата. Ќе се врши обдукција на телата на починатите деца и ќе се проверуваат трагите земени од самото место за да се утврдат причините за пожарот.
Во соопштението од ОЈО не се исклучува и евентуална кривична одговорност.
Живееле од собирање шишиња, без вода и струја
Трагедијата се случи вчера попладне во трошна куќа над последните куќи под ридот Вршник во високиот дел на Велес, која се наоѓала во шума. Во неа живееле Никола Давчевски и Марина Антониевска, со трите малолетни деца и уште еден 19 годишен посинок. Тие биле социјално загрозено семејство. Во куќата живееле околу две години. Живееле од собирање и продавање пластични шишиња.
Кога се случил пожарот децата биле сами дома, родителите ги заклучиле во собата и излегле до продавница. Пожарот го пријавиле соседите околу 16 часот.
– Пожарот е пријавен од граѓани кај нас во 16:05 минути. Отидовме со противпожарното возило џип, а пожарот беше во трошната куќа која е на непристапен терен во шума во високиот дел од градот за последните куќи. Стасавме заедно со родителите кои биле да пазарат во продавница, а ги оставиле децата сами дома. Кровот беше паднат и ние гаснавеме заедно со нас беше и таткото. А кога изгаснавме мислевме дека децата избегале, но за жал најдовме склупчени во едно ќоше прво ги најдовме целосно задушени од огнот и изгорени – двете девојчиња на две и четири години, а потоа малку понатаму и најмалото едногодишно девојче. Глетката беше страшна. Во куќата немаше ни вода ни струја. Во куќата имаше многу пластични шишиња кои ги собирало семејството, а кое било социјално загрозено, изјави за МИА Љубчо Лепидовски командир на Територијалната противпожарна единица од Велес.
По увидот родителите се однесени на распит во полициска станица. Од обвинителството за денеска најавија првични сознанија за тоа што се случило во куќата, во која изгореа трите деца.
Од Министерството за труд и социјална политика денеска соопштија дека семејството било евидентирано во системот на Центарот за социјална работа во Велес и биле корисници на социјална парична помош.
Општината во соработка со Центарот за социјална работа се ангажирани за организирање на погребот за настраданите деца.