Агенцијата на Обединетите нации за бегалци, денеска ги повика државите да преземат побрзи и порешителни чекори и да помогнат да се постигне целта, четири години по отпочнувањето на десетгодишната кампања за искоренување на бездржавјанството во светот.
„Од ноември 2014 години кога кампањата #ЈасПрипаѓам (#1Belong) започна, постигнати се важни резултати. Повеќе од 166.000 лица без државјанство добија државјанство или нивното државјанство беше потврдено, 20 држави се приклучија на Конвенциите за бездржавјанство, со што вкупниот број држави кои пристапиле на Конвенцијата во врска со статусот на лицата без државјанство од 1954 година порасна на 91, додека 73 држави пристапија на Конвенцијата за намалување на бездржавјанството од 1961 година. Девет држави воспоставија или ги подобрија своите процедури за утврдување на бездржавјанство, шест држави ги реформираа своите закони за државјанство, а дополнителни две држави ја отстранија родовата дискриминација која ги спречуваше жените да го пренесат своето државјанство на своите деца. Во девет држави се формално донесени национални планови за искоренување на бездржавјанството“, се вели во соопштението на УНХЦР.
Сепак, и покрај овие постигнувања, милиони луѓе остануваат без државјанство и живеат со нерешен статус насекаде низ светот, а најголемиот дел од нив се наоѓаат во држави во Азија и Африка. Тешко е да се одреди со прецизност колку луѓе се без државјанство или под ризик од бездржавјанство низ светот.
Во 2017 години околу 70 држави пријавија 3,9 милиони лица без државјанство. Но, УНХЦР проценува дека ова е само дел од вкупниот број — вистинскиот број може да биде и трипати повисок.
„Денеска ги повикувам политичарите, владите и законодавците насекаде во светот
да дејствуваат сега, да преземат и поддржат решителни чекори за искоренување на
бездржавјанството во светот до 2024 година”, рече Високиот комесар на Обединетите нации.
Со цел да се зголеми капацитетот на собранијата и законодавните домови за делотворно спречување и намалување на бездржавјанството и заштита на лицата без државјанство, УНХЦР во соработка со Интерпарламентарната унија објави нов прирачник за „Добри практики во законите за државјанство за спречување и намалување на бездржавјанството”.