Советот за безбедност на ОН остро го осуди пробното лансирање на севернокорејскиот проектил и го повтори барањето до Пјонгјанг да ги запре програмите за развој на балистички ракети и нуклеарно вооружување.
Јапонскиот премиер Шинзо Абе и јужнокорејскиот претседател Мун Џае Ин се согласија дека треба да се бара поостра резолуција на УН против Северна Кореја, соопштија јапонски официјални лица.
По итното заседание што уследи по лансирањето, највисокото тело на ОН синоќа, потезите на Пјонгјанг ги нарече скандалозни, кои намерно го поткопуваат мирот и стабилноста во регионот.
Како што пренесува АП, Советот за безбедност ја повика Северна Кореја да преземе директни и конкретни чекори за намалување на тензиите на Корејскиот полуостров и пошироко.
Лансирањето на проектилот, што ја прелета Јапонија, дојде помалку од еден месец откако Советот за безбедност наметна досега најтешки санкции кон Пјонгјанг, но за сега не е јасно дали ќе има дополнителни чекори во таа насока.
Северна Кореја вчера потврди дека лансирала ракета која ја прелета Јапонија и дека ја погодила целта во Јапонското море.
Ракетата „хвасонг 12“ од среден дострел чие лансирање го надгледувал и севернокорјскиот лидер Ким Јонг ун го пресече небото над островот Хокаидо и ртот Еримо долж однапред одредена патека и точно ја погоди целта во северниот дел на Тихиот океан, соопшти севернокорејската агенција КЦНА.
Притоа се наведува дека „вежбата не влијаела на безбедноста на соседните земји“, додека севернокорејскиот лидер „изразил големо задоволство“ од лансирањето.
Агенцијата ја пренесува изјавата на лидерот, според кого „и во иднина ќе има лансирања на балистички ракети во кои мета ќе биде Тихиот океан“.