Онлајн обложувањето е една од точките на денешната владина седница, соопшти министерката за финансии, Нина Ангеловска. Станува збор за иницијатива на која, како што објасни, се работело во периодот и пред корона-кризата, што значи не е нова затоа што и постојното законско решение содржи одредби и членови за онлајн игри на среќа, вклучително и онлајн обложување.
На ваквото решение, за онлајн обложување, според Ангеловска, треба да се гледа од два аспекта. Првиот е што во оваа индустрија работат 8.000 лица, а вториот е подобрување на регулативата.
„Ова е во постојното законско решение, но сè уште не беше имплементирано во пракса. И пред кризната состојба беа изработувани компаративни анализи, бидејќи речиси сите земји го имаат овозможено. Ова е од една страна важно во овој период од апсект дека 8.000 лица работат во индиустријата, а од друга страна е нешто што би било имплементирано во насока на подобрување на регулативата. И така треба да се гледа. Доколку е контролирана средината, ако имаме јасна и прецизна регулатива, ќе можеме да се справиме со проблемот, односно физичките локации кои сè почесто ги има на уплатно-исплатните места“, нагласи Ангеловска.
Рече и дека околу 40 милиони евра се прибираат по основ на посебната давачка од оваа индустрија. Дополнително, треба да се земе предвид и персоналниот данок на доход од игрите на среќа кој учствува со околу 10 отсто од вкупно прибраниот персонален данок.
„Во вонредна состојба ќе бидат воведувани нови решенија. Треба да се обидуваме да наоѓаме начини за адаптирање на многу процеси и да носиме одлуки кои сметаме дека се соодветни за доброто на државата од секој апскет“, рече министерката Ангеловска.