Министерството за здравство (МЗ) информира дека согласно извештајот на Институтот за јавно здравје (ИЈЗ), од 10 до 16 август се направени вкупно 11.605 тестирања на Ковид-19, што е за 2.062 или 17,8 отсто повеќе во споредба со претходната недела.
Од направените 11.605 тестирања, новозаболени со вирусот се 902 лица односно 7,8 отсто. Тоа, како што наведуваат од МЗ, покажува тренд на континуирано намалување во однос на претходните недели кога се движеше од 10, па 9,4 и 8,6 отсто.
Скопје и натаму е лидер по бројот на регистрирани случаи (251 или 27,8 отсто) и Куманово (125 или 13,6 отсто). Во 18 градови во земјава, во наведениот период бројот на новопотврдени случаи е под 20.
Во однос на старосната структура, регистрирани се заболени лица во сите возрасни групи. И во овој период, најзастапена е возрасната група на лица над 60 години со 206 (22,8 отсто) позитивни. Голем број заболени се регистрирани и кај лицата на возраст од 30 до 39 години (163 или 18,1 отсто) и од 50 до 59 години (162 или 18,0%). Најмал број е регистриран кај децата до 9 годишна возраст (26 или 2,9 отсто) и од 10 до 19 години (49 или 5,4 отсто).
Од случаите кои се епидемиолошки истражени (858 или 95,1 отсто), регистрирани се 87 (10,1 отсто) хоспитализирани лица, а кај 244 (28,4 отсто) е регистрирано присуство на коморбидитети. Од вкупниот број на нови случаи, 303 (35,3 отсто) имале контакт со потврден случај, а 27 лица биле на патување во последните 14 дена.
Во споменатиот период, по добиени два негативни теста за присуство на SARS-CoV-2, како оздравени се водат 1.067 лица кои биле хоспитализирани или на домашно лекување, што е за 29 повеќе во споредба со претходната недела.
Регистрирани се 17 смртни случаи од девет градови, што е намалување од 32 отсто во однос на минатата недела. Најголем дел од случаите биле на возраст над 60 години (девет односно 52,9 отсто). Од починатите, 16 биле хоспитализирани, а еден починал во вонболнички услови. Коморбидитети се регистрирани кај 11 починати лица.
Деталните извештаи на Институтот за јавно здравје за состојбата со КОВИД-19 за периодот од 10 до 16 август 2020, како и за кумулативна состојба со вирусот во земјава се достапни на веб-страницата на Институтот (http://iph.mk).