Локалната власт во општина Центар на вонредна седница донесе„ Одлука за начинот на применување на Деталните урбанистички планови“. Со оваа одлука, која беше ставена на дневен ред по предлог на градоначалникот, практично се најде начин како да се продолжи со ревидирање на Деталните урбанистички планови, и покрај одлуката на Уставниот суд за времено запирање на мораториумот.
Со оваа одлука, општината се обврза дека ќе ги спроведува само Деталните урбанистички планови кои се усогласени со Генералниот урбанистички план на Град Скопје, и нема да издава градежни дозволи за спорните 29 планови затоа што се донесени пред да се изгласа ГУП-от во 2012 година.
Во членот 4 од Одлуката пишува дека „се прекинуваат сите постапки кои се доставени преку електронски систем е-дозволи и се однесуваат на издавање одобренија и постапки за издавање на решенија за градење“ за плановите кои се однесуваат на спорните ДУП-ови.
Ваквата одлука градоначаланикот на општина Центар ја најави и во интервју за НОВА ТВ. Богдановиќ изјави дека општината мора да најде начин како да ја спречи реализацијата на ДУП-овите кои се спротивни на Генералниот урбанистички план.
Одлуката во Советот на општина Центар беше изгласана со 16 гласови „за“ а советниците на ВМРО-ДПМНЕ гласаа воздржано.
Пред една недела по иницијатива на Градежната комора и комората на Северозападна Македонија, Уставниот суд времено го стопираше мораториумот за градење во општината, додека не се изјасни дали локалната власт во Центар имала законска и уставна надлежност да донесе одлука за мораториум.
Со денешната одлука, одлуката на Уставниот суд станува беспредметна, затоа што општина Центар сама го укина мораториумот и донесе нова одлука со која доби законска можност да ги ревидира спорните планови, без да издава одобренија за градби.
За останатите отпочнати постапки за кои се издадени одобренија за градба пред 27 декември 2017 година, градежните работи не запираат.