Нема предлог од Владата за повлекување на актуелниот конзул кој е во Њу Џерси и именување нов, изјави вечерва шефот на дипломатијата Бујар Османи, во врска со реакциите во јавноста, откако дел од медиумите вчера објавија дека 28-годишната телевизиска презентерка Бесмира Ејупи била предложена за генерален конзул во Њујорк-Њу Џерси.
– Бидејќи сум ограничен поради фактот што овие шпекулации и нецелосни информации излегуваат од затворена седница на Влада и не сум во состојба да ги образложам, за жал, затоа што пренесување информации од затворена седница на Влада е казниво според закон, она што можам да го кажам е дека уште вчера портпаролите на Влада демантираа, меѓутоа и ние денеска како МНР известивме дека имаме конзул во Тотова, САД и тој има мандат до јуни 2023 и немаме никакви планови да предложиме нов, истакна Османи во гостувањето на ТВ Сител.
Според него, сите именувања, предлози и сите дебати за амбасадори и за конзули, додека не се добие потврда од земјата во којашто заминува, се доверливи информации и не смеат да се коментираат во јавност.
– Имаме девет генерални конзулати, сите се пополнети, само еден конзулат се уште не е пополнет, а тоа е во Торонто. Од овие осум што се пополнети, четворица се надворешни, тројца се внатрешни од МНР, повеќето сум ги наследил што ги именувале моите претходници, така што нашиот закон вели до една четвртина најмалку треба да бидат од куќата, да бидат кариерни дипломати, информира Османи.
Тој притоа се пофали дека минатата година испратил околу 20 амбасадори, што, како што рече, е една третина од вкупниот број амбасадори што ги имаме, и тоа само за една година.
– Од тие 20, дури 16 се дипломати од МНР. Законот вели 25 проценти, јас одам на 85 проценти, бидејќи тоа беше ветувањето и целта дека ќе ја професионализираме дипломатијата, но секогаш ќе има и политички номинирани и амбасадори и конзули, и тие политички номинации доаѓаат од Владата, додаде Османи.
Дел од медиумите вчера објавија дека 28-годишната телевизиска презентарка Бесмија Ејупи на затворена седница на Влада пред два дена била предложена за генерален конзул во Њујорк-Њу Џерси.
МНР претходно излезе со реакција во врска со објавите за испраќање конзул во Њујорк, во која велат дека Северна Македонија во моментов има генерален конзул во Тотова, САД, Јордан Панев.
– Би сакале да реагираме на бројните објавени нецелосни информации поврзани со испраќањето на дипломати во Дипломатско – конзуларните претставништва. Со оглед дека се работи за информации од доверлив карактер, дозволете да информираме дека Северна Македонија во моментов има генерален конзул во Тотова, САД, Јордан Панев, се наведува во соопштението на МНР, во кое додаваат дека Панев е дипломат од кариера, кој е избран согласно сите законски прописи, а во моментов тој е на половина од својот мандат и засега не се предвидува негова предвремена замена.
Вицепремиерот и министер за политички систем и односи меѓу заедниците Артан Груби денеска изјави дека нема никаква одлука и Владата нема именувано генерален конзул во Њујорк. – Нема никаква одлука, не е точна информацијата. Значи нема именувано генерален конзул во Њујорк, и си продолжува генералниот конзул којшто е досега на задача во Њујорк.Така да, нема ништо вистина во тоа, рече Груби.
На новинарско прашање дали може да потврди дека предлогот за генерален конзул за Њу Џерси, што според дел од медиумите бил предложен пред два дена, на денешната затвореена седница наводно бил повлечен, Груби рече дека е погрешна информацијата и ги упати новинарите на соопштението на МНР врска со ова прашање.