Вицепремиерот за европски прашања Бујар Османи, во неделното интервју за Радио Слободна Европа вели дека во јавноста се создала погрешна интерпретација дека новата влада ќе прави реизбор на судии. Тој вели дека планот е да се зголеми улогата на новиот Судски совет.
„Мислам дека е апсолутно погрешна интерпретацијата дека владата или новото парламентарно мнозинство ќе прави реизбор на судии, тоа е во спротивност со препораките на Европската комисија и на телата на Советот на Европа и во спротивност со политиките на новото парламентарно мнозинство и на владата, туку напротив ќе се зголеми улогата на новиот Судски совет во дефинирање на постапките за избори или дисциплинирање на судиите. Дури една од мерките која е предвидена во планот 3-6-9 е анулирање на закон за верификација на факти за дисциплинирање на судиите, бидејќи тоа го сметаме како начин или инструмент за притисок, туку зголемување на улогата на Судскиот совет во тој дел, така што нема да има генерален реизбор на судии, туку воспоставување на систем со цел квалитетен избор на судии, кои ќе бидат независни и непристрасни во својата функција“, вели Османи.
За Планот 3-6-9 тој вели дека многу важен план кој има две цели. Едната е да создаде општество коешто е европско и добро за граѓаните и второ, да се постигнат очекувањата на европските партнери во делот на интегративниот пат.