„Се уште е иницијатива во зародиш, се уште нема ниту еден пишуван документ, но според тоа што го кажуваат сите чинители кои се во зародишот на оваа идеја тоа не е алтернатива на пристапниот процес во кој што земјите од Западен Балкан се движат 20 години , туку нова иницијатива за политичка конвергенција на континентот во ЕУ без притоа да влијае или да биде замена на тоа што го имаме тука“, рече денес шефот на дипломатијата Бујар Османи во врска со идејата на францускиот претседател Макрон за Европска политичка заедница, која на Западен Балкан е дочекана со недоверба затоа што се стравува дека е замена за преговорите и членство во ЕУ.

Османи рече дека се додека нема други објаснувања и Македонија нема да стравува дека е тоа алтернатива за преговори и членство во Унијата. „И ние така го гледаме тоа се додека не има нови објаснувања. Меѓутоа од разговорите што ги имаме со сите претставници во ЕУ, и со оние кои ја заговараат идејата е дека таа не претставува алтернатива. Мислам дека ние треба да бидеме фокусирани на нашиот процес, далеку сме отидени во тој процес и во исполнувањето на критериумите и во формалните чекори на патот кон полноправното членство во ЕУ“, вели министерот за надворешни работи.

Во однос на разговорите со Бугарија за надминување на блокадата кон пристапниот процес што ни ја наметна источниот сосед, Османи рече дека во Рим премиерите Ковачевски и Петков им дале охрабрување на шефовите на дипломатиите на двете земји да продолжат со дијалогот, и дека тоа ќе го направат. „Во моментов нема ништо што можеме да го споделиме во јавноста, кога ќе има, ќе кажеме“, рече министерот Бујар Османи. (С.К.)