По четири часа распит во Кривичниот суд, предмалку објектот го напуштија обвинителот Артан Ајро од Специјалното јавно обвинителство а веднаш потоа и адвокатот Никола Додевски.
Обвинителот Ајро не сакаше да сподели детали за текот на распитот ниту сакаше да образложи зошто СЈО побарало изземање на судијата на претходна постапка во случајот „Трезор“.
Адвокатот Додевски на заминување кусо на новинарите им порача дека одговори за барањето на СЈО треба да бараат од обвинителството а на новинарско прашање „Дали неговите клиенти се појавиле на суд“, тој кусо прокоментира „Се разбира дека се појавија.“
Во предметот „Трезор“ СЈО сомничи три лица од УБК и едно од МВР кои преку договори и анекси за набавка на опрема за шпионирање и нејзино одржување го оштетиле државниот буџет за 860.000 евра.
Во текот на повеќечасовниот распит, новинарите не успееја да видат кога осомничените влегоа во судот а кога го напуштија. Сигурно е само дека тие не се појавија на главниот влез на судот, додека останатите влезови беа забранети за снимање поради силното полициско обезбедување за рочиштето за случајот „Диво насеље“.
Претседателот на Основниот суд Скопје, Владимир Панчевски денеска се пожали од односот на Специјалното јавно обвинителство, кое побара изземање на судијата.
„Претседателот на Основен суд Скопје 1 – Скопје во рок од три дена треба да одлучи по барањето за изземање на судијата, што е трето по ред барање за изземање на судии од страна на СЈО, што претставува преседан во постапување на јавно обвинителство бидејќи во досегашното работење на судот не било поднесено ниту едно вакво барање од страна на останатите обвинителства“, пишува во дописот од судот.
Според Панчевски, со ова СЈО дополнително влијаело на одолговлекување на постапките кои тие ги покренуваат до овој суд.