Распитот на Милан Радоњиќ и Ратко Ромичиќ, осомничени за организирање и учество во убиството на новинатор и сопственикот на весникот Телеграф, Славко Чурувија, траел десет часа и завршил синоќа во два часот по полноќ. Се очекува денеска да биде донесена одлуката за притвор, јавуваат српските медиуми.
Според изјавата на адвокатката Зора Добричинин Никодиновиќ, која ја пренесува агенцијата Танјуг, распитот поминал коректно, а на дешната седница истражниот судија треба да соопшти дали ќе се постапи по предлогот на обвинителството одредување мерка притвор за организиран криминал.
Славко Чурувија беше убиен во времето на бомбардирањето на Србија на 11-ти април 1999 година, во влезот од зградата во којашто живеел.
Како инспиратор и нарачател на убиството се споменуваше Мира Марковиќ, тогашна челничка на партијата Југословенска левица (ЈУЛ), којашто со Социјалистичката партија на Србија (СПС) на нејзиниот сопруг Слободан Милошевиќ, ја сочинуваше тогашната власт.
За речиси петнаесет години, колку што се изминати од убиството, сослушани беа стотици сведоци, но и натаму е непознато кој наредил 27 агенти на СДБ постојано да го следат Чурувија во акцијата под кодното име „Мисир” (Чуран) и во него, пред неговата невенчана сопруга Бранка Прпа, попладнето на 11-ти април, тогаш Велигден, да испука 12 куршуми.
Првиот потпретседател на српската влада Александар Вучиќ неодамна изјави дека „зад убиството на Славко Чурувија стои државата” и дека „наредбодавците се живи”, ветувајќи се дека наскоро ќе биде обелоденета вистината, и дека доколку не биде така, тој самиот ќе поднесе оставка. Во времето на убиството на Чурувија, Вучиќ како челник на Српската радикална партија (СРС) на хашкиот притвореник Воислав Шешељ, беше министер за информирање во коалициската влада на социјалистите на Милошевиќ и ЈУЛ на Мира Марковиќ.
Премиерот и министер за внатрешни работи, Ивица Дачиќ, по повод медиумските најави за апсења во случајот Чурувија изјави дека „сé е во рацете на надлежните државни органи”, како дека „очигледно е дека се откриени нови информации коишто овозможуваат истрагата да биде завршена, да се подигнат одредени обвиненија и да се санкционираат оние коишто се виновни за тоа”.
Според белградските медиуми, продолжувањето на истрагата подразбира и собирање докази за тоа дали некогашниот шев на СДБ, Раде Марковиќ го наредил убиството на Славко Чурувија по налог на Мира Марковиќ. Според досегашните сознанија, Радомир Марковиќ, и високите функционери на службата, Милан Радоњиќ, Ратко Ромиќ и егзекуторот Мирослав Курак ќе бидат обвинети за убиството на Славко Чурувија.