„Остен“ оваа година обележува редок јубилеј – пет децении од Светската галерија на карикатури. Беше основана од прогресивната меѓународна заедница на 6. Средби на солидарност во Скопје во 1969 година што го направи главниот град на Македонија важна референтна точка на дејноста на светската мапа. Во нејзиното подигнување и развој беа вклучени најзначајните македонски имиња во областа на карикатурата, уметници, писатели и истакнати општествени дејци како Блаже Конески (кум на името), Славко Јаневски, Ацо Шопов, Дарко Марковиќ, Ефтин Проевски, Димитар Чудо, Ане Василевски, Владо Малески, Василије Цицо Поповиќ, Панде Јаревски, Миле Попоски, Мице Јанкуловски, Владо Јоциќ, Дукан Јелен, итн.
Централниот настан е закажан на 22 ноември во Националната галерија на Македонија „Чифте амам“. Во него ќе бидат опфатени голема изложба со дела на преку 270 меѓународни уметници, доделување на награди на присутните, документарна изложба „50 години Светска галерија на карикатури.
Организаторите го истакнуваат и успешно завршениот процес на пријавување, селекција и жирирање за редовното издание на Остен Биенале на цртеж. Аплицираа 868 автори од 61 земја со вкупно 2.317 дела.
Во улога на селектор беше Италијанецот Лука Курчи, меѓународното жири го сочинуваа Манос Стефанидис (професор на државниот Универзитет во Атина и куратор во Националната галерија на Грција), Соња Абаџиева (историчар на уметност, куратор и критичар) и Мелани Зеферино (теоретичар и куратор со крос-дисциплинарна заднина и куратор на Биеналето на современа уметност на Франција). Лауреати се Французинот Пјер Сулаж (гранпри за животно остварување) и Англичанецот Хенри Мур (награда Светско културно наследство).