„Ако некој сака да ја влече за коса во Уранија е“, гласи повикот за насилство врз поранешната пратеничка на СДСМ и министерка за одбрана, Радмила Шекеринска, од извесен профил Блефер на социјалната мрежа Х, објавувајќи неовластено фотографија од нејзе како седи во кафуле.
Покрај многуте критики имаше и такви како профилот Зоран Мушонов кој вели: „Ааа не ги сскај 5 години тешка робија чини тоа задоволство“.
Пришто Блефер му одговара: „5 години е внатре во Собрание и ако има пратенички имунитет. На улица треба да провериме како одат казните“.
Профилот Блефер ја избриша фотографијата и повикот за насилство откако не успеа да ги нахушка граѓаните да извршат насилство, како што беа нахушкани на 27 април 2017 година кога упаднаа насилно во Собранието и ги тепаа пратеници на СДСМ, а меѓу тепаните и влечена за коса и удирана со тврди предмети и тупаници беше и Шекеринска.
За да не се мачат „тепачите“ да бараат каква казна предвидува законот, еве што вели Кривичниот законик во Член 152:
Неовластено снимање
(1) Тој што неовластено ќе направи фотографски, филмски или видео снимки на друго лице или на неговите лични простории без негова согласност, повредувајќи ја неговата приватност или тој што таквите снимки непосредно ги пренесува на трето лице или му ги покажува или на друг начин му овозможува со нив да се запознае, ќе се казни со парична казна или со затвор до една година.
(2) Ако делото од став 1 противзаконито го стори службено лице во вршење на службата, ќе се казни со затвор од три месеци до три години.
(3) Ако делото од овој член го стори правно лице, ќе се казни со парична казна
(4) Гонењето за делото од став 1 се презема по приватна тужба.
Дали надлежните институции ќе реагираат и ќе ги санкционираат сите што повикуваат и поттикнуваат насилство?