Новата Оперативно техничката агенција – ОТА во која се пренесени уредите за прислушување мината година следела 153 комуникации, пишува во Извештајот што го поднесе директорот на ОТА до Комисијата за надзор на спроведувањето на посебната истражна мерка за следење на комуникациите.
Во ОТА пристигнале 5 барања за следење на комуникациите од одделот за сузбивање на организиран и сериозен криминал во БЈБ при МВР, а 8 барања од СЈО.
Во Извештајот нема повеќе детали за случаите во кои ОТА ги следела комуникациите.
ОТА беше формирана во ноември минатата година како независна агенција која го изведува техничкиот дел на следење на комуникациите, а снимените комуникации треба да ги предаде на органот кој го барал тоа – Обвинителство, Царина, УБК, СЈО.
Во периодот од два месеци, ОТА потрошила околу 15 илјади евра – за плати и надоместоци, комунални услуги, за набавка на инвентар и поправки.
Од формирањето, ОТА работи без експертска и граѓанска контрола. Претседателот на Собранието Талат Џафери денеска рече во Законот за формирање на ОТА не се предвидени пари за експертите кои треба да ги ангажира Комисијата кога ќе оди во контрола на работата на ОТА.
„Нека си направат измена на Законот јас немам законска основа да давам пари затоа што во Законот не е предвидена таква ставка. Ако дадам пари ќе го прекршам Законот со ненаменско трошење на пари. Утре јас ќе одговорам“, рече Талат Џафери, претседател на Собранието
Претседателот на Комисијата за надзор на спроведувањето на посебната истражна мерка за следење на комуникациите Емил Димитриев уште во ноември испратил писмо до Џафери со кое бара Собранието да обезбеди буџет и да почне постапката за ангажирање на експерти.
„Во ноември доставив писмо до Џафери дека е неопходно Собранието да помогне во делот на обезбедување буџет и спроведување на постапката за огласување за избор на експерти, бидејќи Комисијата нема ресурси тоа да го направи“, кажа Димитриев минатата недела.
Според Димитриев комисијата треба да ангажира експерти од дигиталната форензика, телекомуникации и веројатно експерт од областа на правото, затоа што членовите на Комисијата не се стручни за овие области. Планот е да се ангажираат 12 експерти, а по двајца од нив да ја посетуваат Агенцијата во шестте годишни контроли. Годишно, за експертите се планира буџет од 20 000 евра.