На денешната седница на Светиот архиерејски Синод, игуменот на Бигорскиот манастир „Свети Јован Крстител“, високопреподобниот архимандрит Партениј, беше едногласно избран за нов епископ на Македонската православна црква – Охридска архиепископија (МПЦ-ОА).
Од Синодот информираа дека отец Партениј беше предложен за нов владика од неговиот надлежен Архиереј, митрополитот Дебарско-кичевски Тимотеј, а едногласно потврден од сите членови на Синодот на МПЦ-ОА. Неговата хиротонија е закажана за 12 јули годинава, на празникот на светите апостоли Петар и Павле, во храмот „Света Софија“ во Охрид.
Отец Партениј ќе биде викарен епископ на Дебарско-кичевската епархија, со титула „Епископ Антаниски“ (според македонскиот античкиот град Антанија, кој бил епископско седиште), но истовремено ќе ја задржи и својата должност како игумен на Бигорскиот Манастир, каде што ќе биде и неговото постојано седиште.
Со своето дваесет и петгодишно монашко и игуменско искуство, отец Партениј влегува во архиерејски чин со досега најголем монашки стаж во поновата историја на МПЦ-ОА. Во црковните кругови важи за искусен духовник, кој ужива голема почит не само кај верниците, туку и од пошироката јавност.
Уште од своето доаѓање во Бигорскиот манастир, отец Партениј енергично се посветува на севкупната обнова на ова големо светилиште, по долгиот период на негова духовна замреност и материјална запустеност. Како плод на таа посветеност, во 2001 година во целост е возобновен и духовно заживеан и манастирскиот метох – женскиот манастир посветен на „Св. Георгиј Победоносец“ во село Рајчица.
Паралелно со обновата на Бигорскиот манастир и на неговиот метох во Рајчица, архимандритот Партениј се зафаќа и со нови градежни потфати, меѓу кои дрвениот храм посветен на „Св. Серафим Саровски“, изградбата на храм во византиско-македонски стил во село Ростуше посветен на „Пресвета Богородица“, како и на новиот манастирски метох „Св. Кирил и Методиј“ во с. Битуше. Во 2016 година, со благослов и во соработка со неговиот надлежен митрополит, Тимотеј тој го возобновува монашкиот живот во уште еден голем македонски духовен центар – манастирот „Пречиста Кичевска“, каде испраќа шест монахињи од Рајчица, негови духовни чеда, а исто така го продолжува и монашкиот живот во Кнежинскиот манастир.
Отец Партениј досега бил повеќе пати наградуван со црковни и граѓански признанија и награди од разни поединци, организации и институции. Меѓу другото, тој е добитник и на највисоката почесна награда на Европската Унија – „Европски Граѓанин“, поради, како што стои во официјалното образложение за наградата, „неговата хуманитарна дејност, работата со социјално ранливи категории што се особено актуелен проблем на денешницата и придонесот за градење мостови и унапредување на соработката меѓу народите на културно и духовно поле, како и јакнење на соживотот и меѓусебното почитување“.
Името на отец Партениј повеќе години се наоѓаше на листата на кандидати за епископи на МПЦ-ОА, а пред петнаесетина години нему му било предложено да стане митрополит на Повардарската епархија, достоинство што тој го одбил, со образложение дека не сака да го напушти Бигорскиот манастир и мијачкиот крај за чие заживување го вложил сиот свој живот.
Отец Партениј станува владика во годината кога Бигорскиот манастир слави 1000 години од неговото основање во 1020 година.