Пријателскиот фудбалски натпревар помеѓу репрезентациите на Германија и Холандија што требаше да се одигра вечерва, е откажан, од како што се наведува безбедносни причини.
Два часа пред почетокот на натпреварот стадионот во Хановер каде што требаше да се одигра мечот е евакуиран. Во меѓувреме е евакуиран уште еден стадион во градот, каде што требало да се одржи концерт. Евакуирана е и железничката станица, каде наводно бил пронајден сомнителен пакет.
Весникот Билд, повикувајќи се на полициски извори, објави дека причина за евакуацијата е „конкретна закана“, додека според германската новинска агенција ДПА, безбедносните служби добиле информација за потенцијален терористички напад „што требало да се сфати сериозно“.
И шефот на полицијата во Хановер Волкер Клуве потврдил дека се работи за „апсолутно реална“ закана, наводно за можен план на терористите да активираат експлозивна направа за време на натпреварот.
Весникот Тагесшпигел пак, повикувајќи се извори во безбедносните служби, објави, дека информацијата за „планиран терористички напад“ дошла од странски извори.
Локалните медиуми во Хановер шпекулираат и со информацијата дека во близина на стадионот било пронајдено возило на итна помош, полно со експлозив, но за ова засега нема официјална потврда.
Претходно, германската канцеларка Ангела Меркел најави дека ќе биде меѓу гледачите во арената со 49.000 седишта.
Вчера беше откажан и пријателскиот натпревар меѓу фудбалските репрезентации на Белгија и Шпанија што требаше да се одигра денеска, поради безбедносни причини по нападите во Париз.
Единствено се одржа натпреварот меѓу Англија и Франција на стадионот Вембли, што започна со едноминутно молчење во чест на 129-те жртви во нападите во Париз.