Првиот случај на „флурона”, односно истовремена зараза со коронавирус и грип, е забележан во Израел.
Станува збор за млада трудница со благи симптоми, која моментално е примена во болницата Беилинсон во градот Петач Тиква, јави Индепендент.
Израелското министерство за здравство соопшти дека го проучуваат случајот за да утврдат дали комбинацијата од двете инфекции може да предизвика посериозно заболување.
„Ѝ беа дијагностицирани грип и коронавирус веднаш штом пристигна“, изјави професорот Арнон Вижницер, директор на Одделот за гинекологија во болницата, за локалниот весник Хамодија. „Двата теста се вратија позитивни, дури и откако повторно ги проверивме“.
„Болеста е истата болест; тие се вирусни и предизвикуваат отежнато дишење бидејќи и двете го напаѓаат горниот респираторен тракт“, додаде тој.
Вижницер додаде дека трудницата не била вакцинирана против коронавирус или грип, но немала особено силни симптоми. Таа се чувствува добро и се очекува да биде пуштена од болница во четврток, јави Њузвик.
Ова е прв документиран случај на истовремена инфекција со коронавирус и вирус на грип, но здравствените експерти веруваат дека имало и други кои не се документирани.