Мрежа од тајни офшор зделки и заеми вредни две милијарди долари остава трага која води до претседателот на Русија, Владимир Путин, пишува Гардијан. Откритието е дел од огромното протекување на документи и податоци за офшор компании во Панама која изложи фирми и финансиски тајни на светски лидери, политичари, јавни службеници, бизнисмени, луѓе од шоу бизнисот. Според британскиот весник, документите покажуваат дека овие пари ги направиле членовите на семејството на Путин многу богати. Иако името на рускиот претседател не се појавува во ниеден од нив, податоците покажуваат шема – неговите пријатели заработиле милиони од зделките кои не би можеле да бидат обезбедени без патронажа.
Офшор трагата започнува во Панама, води низ Русија, Швајцарија и Кипар и вклучува приватен скијачки хотелски комплекс каде најмладата ќерка на Путин, Катерина се венчала во 2013 година. Документите од Панама особено фрлаат светло врз Сергеј Ролдугин, кој му е најдобар пријател на Путин. Тој го запознал Путин со неговата сегашна сопруга, Људмила и е кум на неговата најстара ќерка, Марија.
Професионалниот музичар, веќе акумулирал контрола врз имот вреден најмалку 100 милиони долари. Ролдугин орекувал пред службените лица во банките во Швајцарија и Луксембург дека е близок до било кои руски јавни личности. Сепак документите откриваат дека тој има 12.5% акции во најголемата руска маркетинг агенција, Video International, која има годишен приход од 800 милиони фунти а нејзиното сопствеништво е добро чувана тајна. Тој исто така поседува 3.2% од Банката „Росија“. Приватната банка од Санкт Петербург се опишува како “стара пријателска банка” на Путин. САД воведе санкции против неа, по руската инвазија на Украина. Овие податоци се само дел од серијата поврзани финансиски шеми откриени во документите кои се вртат околу оваа банка. Банката е водена од Јури Ковалчук. САД тврдат дека тој е „личен банкар” за многу високи руски владини службеници, вклучувајќи го и Путин. Документите од Панама откриваат дека Ковалчук и Банката Росија постигнале трансфер на најмалку една милијарда долари на специјално создаден офшор ентитет наречен „Sandalwood Continental“.