Ова монденско гратче се наоѓа околу 200 километри јужно од Лос Анџелес, и 230-тина километри североисточно од Сан Диего. Според последниот попис од 2010-та, таму живеат 45.000 жители, но бројката вртоглаво се менува за време на меѓународниот филмски фестивал.
Со сува клима, 300 сончеви денови во годината и просечна температура од 25 степени, Палм Спрингс е идеално место да уживате под сончевите зраци, но и во голф, коњички трки, возење велосипеди по планини или пак излети во пустината што почнува веднаш откако ќе заврши градот.
Околу 300 жители на Палм Спрингс се овековечени со ѕвезди на Патеката на славните во градот.
Палм Спрингс важи за популарно место за живеење на богатите и познатите од Холивуд, но и пензионирани Американци и Канаѓани. Туризмот е главен двигател на градската економија со 1,6 милиони посетители годишно, според стопанската комора на Палм Спрингс.
Посетителите имаат различни причини зошто доаѓаат во Палм Спрингс.
„Ноќниот живот и забавата во Палм Спрингс. Клубовите, но и меѓународниот филмски фестивал“, вели еден минувач.
„Планинарањето во националниот парк Дрвото Џошуа“, кажува друг.
„Добро место за бегство од Сан Диего, на само два часа со автомобил“, објаснува еден посетител.
„Луѓето се пријатни“, додава друг.
Еден брачен пар дошол заради меѓународниот филмски фестивал: „Доаѓаме 5-6 години по ред“, велат.
На 22-годишна возраст во 1949-та, токму во клуб во Палм Спрингс, беше „откриена“ Мерлин Монро, од каде почнува нејзината блескава кариера.
Уште пред Втората светска војна, Палм Спрингс важел за светска монденска населба, каде викендички имале Френк Синатра, Марлен Дитрих, Боб Хоуп, Лорета Јанг. Трендот продолжува и денес – тука прибежиште од папараците најдоа Леонардо ди Каприо, Хали Бери, Гвен Стефани, на само два часа од Холивуд. Друштво им прават бројни европски тајкуни кои уживаат во бескрајните сончеви зраци и спокојот – среде пустината.