Сите родители да си ги прифатат децата такви какви што се, да не се откажуваат никако од нив и да разговараат со нив, порача Марија Костадиновска, мајка на ЛГБТИ девојка на втората Парада на гордоста која под мотото Вон ѕидовите” се одржа денеска во Скопје.

Главната порака на учесниците на Скопје Прајд е „Љубовта е љубов“, а дека „таа е посилна кога нашите гласови се обединети„ но и дека повеќе не треба да се сокриваме, туку да имаме право да учествуваме во сите сфери на живеењето“. Побараа и донесување закон за правно признавање на род.

Стотици поддржувачи на ЛГБТИ заедницата и на трансродовите луѓе маршираа еден час низ центарот на Скопје, по што продолжија до Школка во Градскиот парк од каде ги упатија пораките. Таму се одржа и музичката програма, која

започна со настап на Васил Гарванлиев.

Од Националната мрежа против хомофобија и трансфобија, која е организатор на оваа манифестација, изјавија дека парадата е протест, но и прослава, на која повторно ги актуелизираат надежите за посолидарно, похумано и поправедно општество. Учесниците нагласија дека тие во земјата се граѓани од втор ред, трпат насилство, додека  полицијата молчи.

– Месецот на гордоста нè тера да видиме до каде сме стигнале, каков напредок сме оствариле и како ќе продолжиме. Здравствената криза на суров начин ни ја покажа системската обесправеност на ранливите луѓе од заедницата, трансродовите лица ги остави без најосновите здравствени и социјални услуги и во сиромаштија, бидејќи законот за правното признавање на родот не е сè уште донесен, со месеци и овие луѓе немаат еден единствен личен документ со кој можат да се претстават во институциите, истакна Елена Петровска од коалицијата „Маргини“, дел од организацискиот одбор на Скопје Прајд.

И дел од функционерите, но и амбасадори во земјата, дадоа поддршка на втората Парада на гордоста; премиерот Зоран Заев синоќа се огласи на Фејсбук. Претседателот Стево Пендаровски, со сопругата Елизабета Ѓоргиевска присуствуваше на парадата, како и министерката за одбрана, Радмила Шекеринска, министерката за култура, Ирена Стефоска, министерката за образование и наука, Мила Царовска, министерката за труд и социјална политика, Јагода Шахпаска. Меѓу присутните на парадата беше и директорката на Клиниката за инфективни болести и фебрилни состојби, Милена Стевановиќ и други.

– Задача на функционерите е поддршката на вакви настани, затоа што на тој начин дополнително и на поинакво ниво се подига свеста дека и луѓето од ЛГБТ заедницата треба да ги уживаат истите права како и другите граѓани, рече  пратеничката Љатифе Шиковска.

Претседателката на ДОМ, Маја Морачанин,  рече дека „бесмислено е во 21 век да му се оспоруваат правата за нормален достоинствен живот на некој граѓанин или граѓанка. И затоа пораката која ја испраќаме на овој Скопје прајд е да се сопре со дискриминацијата врз лицата од ЛГБТ, говорот на омраза и насилствата од омраза, стигматизацијата“.

Но, дел од функционерите се огласија и со различни ставови. Министерот за земјоделство, шумарство и водостопанство, Аријанит Хоџа, на Фејсбук објави дека не може да најде аргументи како на своите деца да им објасни зошто се одржува Парадата на гордоста денеска во Скопје. Според него, традиционалното семејство е нешто свето.

Парадата заврши попладнево без инциденти, а во забавната програма учествуваа и Соња Исмаил, Вера Вендета, Васил Гарванлиев, Фифи Јаневска, Туна, Ивана Драгшиќ, Узун Баба и Зоки Бејбе.

А во Битола вечерва ќе се одржи контра Парада.