Новинарката Марина Овсјаникова која вчера упадна во тв-програмата на руската државна телевизија со транспарент против војната во Украина доби парична казна од 250 евра.
Судот ја прогласи Марина Овсјаникова за виновна за непочитување на законот за протести, објави руската државна новинска агенција РИА.
Новинарката беше обвинета за организирање неовластен јавен настан, со што и се закануваше парична казна, општокорисна работа или 10 дена затвор. Овсјаникова беше приведена по протестот.
Европската федерација на новинари (ЕФЈ) претходно побара итно ослободување на Овсјаникова.
„Етичкиот чин на Овсјаникова ги потсетува новинарите дека тие се таму за да служат на вистината и на јавниот интерес, а не на посебните интереси на оние што се на власт. Силно ги осудуваме обвиненијата против неа и бараме тие веднаш да бидат отфрлени“, рече генералниот секретар на ЕФЈ, Рикардо Гутиерез.
Францускиот претседател Емануел Макрон денеска и понуди азил или други форми на конзуларна заштита на новинарката.