Меѓународниот ден на хомофобија, трансфобија и бифобија 17 мај, од независноста на државата за прв пат се одбележа и во Собранието, а наградата за поддржувач на годината ја доби  Интерпартиската парламентарна група за правата на ЛГБТИ лицата.

Наградата ја додели  Националната мрежа за борба против хомофобија и трансфобија, за кампањата „Не суди кој кого љуби“ која ја поддржале и пратеници од оваа група.

Маја Морачанин, пратеник и координатор на Интерпартиската парламентарна група за правата на ЛГБТИ лицата рече дека „оваа група е одличен пример како со постојана комуникација и работа на невладините организации може да се направат значителни исчекори во унапредување на човековите права и слободи“.

„ Она што не очекува во следниот период и за кој што ние како група се залагаме е и понатамошно усовршување и унапредување на законската регулатива во правното признавање на родот, но она што е многу важно за сите нас е практичната имплементација на овие закони кои ние ги донесовме, затоа што само низ ефикасна имплементација нашите сограѓани можат навистина да ги почуствуваат во своите секојдневни животи придобивките од овие законски промени“ рече Морачанин.

Јагода Шахпаска, член на групата, рече дека ниту една битка не е лесна, но секој треба да ги води своите битки .

„Пробивањето на мразот оди тешко, но доколку се обединат и регрутираат поголем број пратеници од законодавниот дом, тогаш таа битка ќе биде многу полесна“ рече Шахпаска.

Северна Македонија се најде на 40-то место од вкупно 49 европски држави според почитувањето на човековите права на ЛГБТИ лицата, во новото рангирање на ИЛГА – Европа.

Со само 16% реализација на законите и политиките кои влијаат на животите на ЛГБТИ лицата, земјава во споредба со минатогодишното рангирање има напредок од само една позиција и скоро никакво подобрување во поглед на регулативата.

Во делот од извештајот за Северна Македонија се наведува дека ЛГБТИ заедницата во државава се соочува со дискриминација, закани, говор на омраза и ограничен пристап до мејнстрим медиумите.

За минатата 2018 година, која е предмет на извештајот, регистрирани се и 43 злосторства од омраза и шест случаи на полициска злоупотреба.