ВМРО-ДПМНЕ ги почна, како што велат, суштинските разговори со парламентарните партии потписници на Предлог-законот за изменување и дополнување на Изборниот законик по што ќе разговараат и со другите парламентарни партии.
Формирањето една изборна единица, е носечка тема во разговорите за што веќе Предлог-законот е стигнат во собранието и на него веќе стојат потписите од неколку парламентарци, информира координаторот на пратеничката група на ВМРО-ДПМНЕ, Никола Мицевски.
– Во текот на денешниот ден имавме средба со Демократскиот сојуз претставуван од колегата пратеник Павле Трајанов и со ВМРО – Народна партија и на средбата беше колегата пратеник Љупчо Балковски, со кој што поразговаравме за овие актуелни теми за кои што разговараме сега. Една изборна единица беше темата на разговорите за која што се дискутираше на тие средби и секако можноста за размислување односно нивните предлози за поставување на одреден праг при тие изборни процеси. Со различни идеи се политичките партии, на крај заклучивме дека овој процес треба да отпочне во насока на демократизација на државата. Гледаме дека се создава клима за оваа работа и процесот ќе продолжи и во наредниот период, изјави Мицевски.
Веќе утре ќе имало дополнителни средби и со други претставници на парламентарни партии, информира координаторот на пратеничката група на ВМРО-ДПМНЕ Мицевски.
Во врска со реформите на изборниот законик од Демократскиот сојуз предлагаат промени кои би се одвивале во три фази и тоа:
– Во првата фаза да се донесат измените на Изборниот законик, со кои Македонија ќе биде една изборна единица и без изборен праг
– Во втората фаза, да се направат коренити реформи на изборните правила, со кои ќе се отстранат системските предности на четирите партии, посебно во врска со медиумското претставување и финансирање на изборната кампања од Буџетот на државата
– Третата фаза, уставни промени со кои ќе се намали бројот на пратеници од 120 на 90, како определба на Демократскиот сојуз за рационализација не само со намалување на бројот на пратеници, туку и бројот на министерствата, бројните агенции, регулаторни тела и сл.
Ова се барањата на Демократскиот Сојуз за кои ќе се залагаат во дебатата за измените на Изборниот законик кој веќе влезе во собраниска процедура.
(М.Т.)