Ивон Величковски: Владата на Северна Македонија свесно и целосно го запре преговарачкиот процес. Тој ќе остане во застој до исполнувањето на обврските од Преговарачката рамка.
Целта на Владата е со запирањето на преговорите да го избегне првото преговарачко поглавје: Владеење на правото. И со тоа – прашањето на борбата со корупцијата и функционалноста во (право)судството и довербата во него, додека ги црпи европските фондови дополнувајќи го празниот буџет.
Отпочнатите преговори по ова поглавје веќе ќе значеа реформи низ кои ќе дојдевме до темелна истрага и судски епилог за многу прашања вклучително тековно горливите – од трагедијата во Кочани, преку злоупотребите на европските фондови до шверцот на над 50 тони марихуана.
За НОВА РЕПУБЛИКА, оваа политика на ВМРО-ДПМНЕ и неговата коалиција е очекувана.
Но веќе не сме изненадени што со своето досегашно и тековно однесување, македонската парламентарна „опозиција“ е вградена во политиката на Владата (или зависна од Владата, сеедно) – за држење на статус-квото.
И тоа ќе остане така се додека не поднесе амандмани за дополнување на Уставот – бидејќи нема „креативни решенија“ и имплементацијата на Преговарачката рамка значи исполнување на сите нејзини одредби.
Во овој момент, традиционалните и парламентарните партии остануваат спротивставени на нацијата на Северна Македонија и македонскиот народ: партиите се откажани од членството во ЕУ, а народот и нацијата – не.
Молкот на овие теми во медиумите, оттука, е сосем очекуван. Затоа што преговорите со ЕУ ќе ја топат моќта на олигархијата, како сопственик на традиционалните партии и медиуми заедно.
Извор: Фејсбук