Партиски знамиња на јарбол заедно со државните знамиња и натаму останаа да се веат и на денот на изборниот молк, што е спротивно на законот и е кривично дело. Екипата на НОВАТВ и денеска ги забележа знамињата на една од владејачките партии на улицата „Февруарски поход“, случај за кој МВР веќе отвори предмет.
Во вчерашното соопштение МВР објави дека извршило проверки на веродостојноста на информациите објавени во медиумите за поставување на партиски знамиња, на места кои според законските прописи не се обележани од страна на Општините и градот Скопје за поставување на рекламен материјал на политичките партии.
„Од извршениот увид, беше констатирано дека знамиња на една владејачка политичка партија се истакнати на повеќе места во Општината Аеродром спротивно на законските прописи“, пишува во соопштението од МВР.
МВР презеде мерки и утврди дека на ул. Гаврил Констатиновиќ , во близина на ул. Февруарски поход било затекнато лицето П.М. кое изјавило дека, заедно со уште неколку други лица, со скали местеле државни и партиски знамиња. Против сторителите на овој чин МВР ке презема мерки со поднесување на соодветни поднесоци.
Инаку, Државната изборна комисија и МВР имаат потпишано правилник со кој се регулира постапувањето на полицијата во текот на изборниот процес. Во него стои дека во вакви случаи општинската изборна комисија треба да побара од МВР асистенција за отстранување на знамињата.