Опериран пред неколку дена од тумор на мозокот, пациентот којшто ноќеска скокна од прозорец на Клиниката за неврохирургија, се здобил со повеќе скршеници и со крвавење во стомакот, а вистинска среќа е што при падот не ја повредил и главата. По овие интервенции на главата, може да се случи промена во однесувањето, болниот да стане агресивен, велат лекарите. Но може да се јават и други нарушувања, како психички растројства.
Пациентот од Свети Николе што ноќеска скокна низ прозорец од првиот кат на Неврохирургија, едвај спасил жива глава – тој заврши со неколку скршеници на ногата, ребрата, но и со други повреди. Добил и крвавење во стомакот, по што бил итно опериран и сега е префрлен на КАРИЛ, потврдија за НоваТВ од Универзитетската Клиника за неврохирургија.
Пред да скокне, тој нападнал друг пациент и болничар, кон кои фрлал предмети. На Клиниката објаснуваат дека не е првпат да се случат вакви инциденти и хоспитализирани пациенти агресивно да се однесуваат. Но за тоа, нагласуваат лекарите, најчесто има и причина.
– За жал, не е првпат. Регистрирани се и други инциденти кога оперирани пациенти агресивно се однесуваат, а претпоставуваме дека имал некоја акутна психоза пациентот, па скокнал низ прозорец од 1-иот кат. При падот се здобил со неколку фрактури на ногата, а има и скршени ребра. Тој добил и крвавење во стомакот, па морал да биде и опериран, по што е префрлен на КАРИЛ. Среќа е што во целиот инцидент при падот тој не добил повреди и на главата. Поради крвавење во стомакот и другите повреди морало да се изврши хируршка интервенција. Пациентот сега е во стабилна состојба, појаснува в.д. директорот на Клиниката, д-р Александар Жупаноски.
Од Неврохирургија по инцидентот повикале полиција и направен е записник за случајот.
За агресивното однесување на 62-годишниот пациент од Свети Николе кој фрлал предмети кон другиот пациент и кон болничарот коишто се обидувале да го смират, неврохирузите откриваат која може да е причината.
– Овој пациент бил опериран од тумор на мозокот и по овие интервенции може да се случи промена во однесувањето и да стане агресивен. Може да се јават и други нарушувања, како психички растројства и друго. Овие нарушувања се познати и опишани и во литературата и се очекувани по операции на тумори во глава и други невролошки процеси, додаваат неврохирурзите.
Во врска со тоа ќе биде ли дополнително обезбеден одделот каде се хоспитализираат пациентите, појаснуваат:
– Не можеме да ставаме решетки на прозорците, не сме психијатрија. Се преземаат и дополнителни мерки, токму заради вакви можни настани, но некогаш семејствата на пациентите реагираат, велат на клиниката.
Љубица Балабан