„Земјоделците нема на кого да го продадат родот. И покрај изјавите на министерот за земјоделство дека е постигнат договор со мелничарите за 14- 15 денари откупна цена, пченицата никој не ја купува или на земјоделците им се нуди цена од 8-9 денари за килограм“, изјави денеска пред новинарите Ленче Николовска, претседател на Собраниската комисија за земјоделство, шумарство и водостопанство.
„Владата согласно законот за земјоделство треба да изврши интервентен откуп на околу 10.000 тони пченица од условно помалите земјоделски производители. По цена од 15 денари за килограм тоа се нешто повеќе од 2 милиони евра, пари кои државата повторно ќе ги врати во јануари кога ќе ја даде пченицата на продажба“, објасни Николовска.
Според неа земјоделците мора да бидат заштитени од државата кога е пласманот во прашање. Проблемот со пласманот е проблем на државата, особено за производство на стртешки култури како пченицата, тоа е лебот на граѓаните.
„Аграрот е сложен сектор, кој заслужува посебно внимание. Мора да се прогнозира и да се реагира на време. Она што седум години го прави оваа влада е само гол популизам и корумпирање на земјоделците со субвенции.
– Токму затоа во последниве 7 години имаме за 20 000 хектари намалување на површините под пченица и 60 000 тони помало производство.
– Овој тренд мора да запре преку долгорочно решение за производство на лебно жито. Основно е да се намали производната цена на пченицата преку поефтина нафта и репроматеријали и добивање на субвенциите на време пред сеидба, како што прават сите влади во земјите од регионот.
– На овој начин нема да има потреба од ризични мерки кои можат да го доведат во прашање извозот на останатите македонски земјоделски производи“, истакна претседателката на Собраниската комисија за земјоделство, шумарство и водостопанство.