Новата лидерска средба кај претседателот Стево Пендаровски е закажана за понеделник во 12 часот и во неа се очекува да биде постигнат консензус за датумот на одржување на вонредните парламентарни избори што беа одложени на 12 април поради епидемијата на коронавирусот.
Понеделник како термин за лидерската средба начелно го најави и самиот Пендаровски на прес-конференцијата по вчерашниот состанок на Советот на безбедност, но не можеше да го потврди од причина што дел од лидерите на политичките партии истакнале оти имаат планирани обврски за тој ден.
Партиите и натаму се цврсти на своите ставови. Владеачката СДСМ е за избори во првиот можен момент и по можност до крајот на јуни, штом ситуацијата со ковид-19 ќе го дозволи тоа. Социјалдемократите, по координацијата со партнерите од коалицијата „Можеме“, на последната лидерска кај Пендаровски отидоа со предлог 14 јуни за сега да го поместат за 8 дена по вчерашната одлука на претседателот за продолжување на вонредната состојба за нови 14 дена, а не 30 колку што побара Владата.
Опозициската ВМРО-ДПМНЕ, пак, е против брзи избори и смета дека истите би требало да се одржат во јули. Но, сепак, истакнуваат дека ќе го почитуваат и мислењето на Комисијата за заразни болести.
За периодот меѓу двете лидерски средби (онаа во вторник и претстојната во понеделник) беше договорено да се консултираат Комисијата за заразни болести која веќе изготви Протокол за процесот од предизборната кампања до денот на гласање. Од Државната изборна комисија (ДИК) се очекуваше мислење за временска рамка на организација и одржување на изборите, иако меѓу нејзините членови има спротивставени мислења, па едни го застапуваат ставот дека изборниот процес треба да продолжи каде што застана со владината Уредба со законска сила, а други сметаат дека изборните рокови треба да се вратат на почеток.
И, конечно, беше најавено и мислење од ОБСЕ/ОДИХР за мониторирање на изборите за целокупниот процес да добие силна меѓународна верификација.