Македонскиот претседател Стево Пендаровски предлага во наредниот период да се одржи вонреден Самит на земјите од Западниот Балкан на кој „ќе се разговара за проширувањето и добрососедските односи и да ги отфрлиме алтернативите на проширувањето“. Доколку има согласност, Самитот би се одржал во Македонија.
Ваквиот предлог македонскиот претседатал го изнесе по средбата со албанскиот претседател Илир Мета во Тирана. Ова е прва средба на официјално ниво меѓу двете земји по одбивањето од страна на ЕУ да одреди датум за почеток на преговорите за Македонија и за Албанија.
Пендаровски рече дека со албанскиот претседател се согласиле дека како претседатели се должни да продолжат да ги охрабруваат сите политички партии во двете држави да продолжат со европската реформската агенда и да ги убедуваат европските лидери дека преговорите со земјите во регионот се влог во стабилноста и просперитетот.
На новинарско прашање за одлуката на Брисел за недобивање на датум за преговори и за дилемите дали двете земји треба да се одвојат на тој пат, Пендаровски коментираше дека негов став е дека двете земји треба да ги почнат пристапните преговори кои траат доволно долго за двете земји да ги исполнат европските вредности.
„Ова е казна за целиот регион. Сосема незаслужена“рече Пендаровски.
На средбата со Мета, македонскиот претседател предложил да се формира и неформална група на македонско – албанско пријателство.
„Дадов иницијатива да се формира неформална група на македонско – албанско пријателство во која ќе членуваат стопанственици, интелектуалци, луѓе од културата но пред се младите кои би се состанувале и би давале предлози за унапредување на соработката“ рече Пендаровски и додаде дека политички добрите односи треба да се рефлектираат и во економијата.
На средбата разговарале и за малцинствата кои живеат во двете земји.