Вицепремиерот Владимир Пешевски во изјава за телевизија Канал 5 вели дека еврообврзницата сепак ќе биде издаде, а со писмото на Кире Наумов од СДСМ кој ги преупреди банките за задолжувањето, се прави штета на репутацијата на земјата.
-Со тоа писмо се нанесува голема штета на Република Македонија, бидејќи еврообврзницата се издаваше за период од две години, значи не требаше сите средства да се употребат само за оваа година, туку и за следната. Со ова се нанесува огромна штета на репутацијата на Република Македонија бидејќи и покрај тоа што не постоeја правни пречки за издавање на еврообврзницата сепак инвеститорите и советници, сите вакви написи ги следат со крајно внимание и ќе биде потребно сега да бидат дополнително уверени дека не постојат пречки за нејзино издавање, вели Пешевски.
Издвањето на еврообврзница е одложено денеска откако до заедничкиот менаџмент составен од претставници на Сити, Дојче банк, Ерсте банк и Сосиете женерал кои требаше да тргуваат со неа било испратено писмо од Наумов во кое се наведува дека земјата можеби нема легална основа за нејзино издавање.
Наумов на денешната прес-конференција порача дека pроцесот на издавање на еврообврзницата од 650 милиони евра е одложен, но не и прекинат, бидејќи власта побарала
правно толкување за важноста на целата постапка од страна на Министерството за правда кое ќе биде испратено до банките за тоа дали е неопходно толкаво задолжување, мислење кое согласно Законот за јавен долг требало да биде издадено пред носењето на одлуката за задолжување.
– Никола Груевски и ВМРО ДПМНЕ по којзнае кој пат спасот го гледаат во својот коалиционен партнер ДУИ. Со ваквото темпо на задолжување Груевски и ВМРО ДПМНЕ ги туркаат граѓаните и РМ кон финансиски колапс. Пари во Буџетот за плати и пензии има. Задолжувањето е за непродуктивни трошења корупција и криминал. Со ребаланс на Буџетот власта може веднаш да скрати огромни средства за непродуктивни трошоци како 18 милиони евра за Милениумско тркало, 5 милиони евра за барокни фасади, а може да се продаде и мерцедесот на Груевски од 600.000 евра, рече Наумов.
Според него доколку цената на еврообврзницата се зголеми при следното задолжување, тоа нема да биде поради неговото писмо испратено до заедничкиот менаџмент на банките кои треба да тргуваат со еврообврзницата, туку ќе биде поради сомнежите за злоупотреба на средства од ИПА програмата, дефицитот на Буџетот, а е јасен сигнал што Македонија остана и без постојан претставник на ММФ.