Денеска се одбележуваат пет години од случувањата во кумановската населба „Диво Насеље“. На 9 мај во 2015 година, македонските граѓани, а особено кумановци, отворија очи со вознемирувачка вест, фотографии и видео клипови. Се разбудија со звуци од оружје, надлетувања хеликоптери, дел од градот во близина на „Тоде Мендол“ или попознат како Диво Насеље беше затворен. Граѓаните и наредниот ден слушаа рафали, се гледаше црн чад.
Денеска за овој настан сведочат вдлабнатини од куршуми на една од куќите на почеток од уличката „Јоско Илиевски“ која сведочи за кумановските настани од 9 и 10 мај 2015 година. Граѓаните велат дека спомените не треба да се заборават и никогаш да не се повторат. Но, јавноста и натаму е без одговори на прашања и дилеми што точно се навистина се случуваше на тој ден пред пола деценија.
Во престрелките животот го загубија Жарко Кузмановски, Ненад Серафимовски, Сашо Самојловски, Бобан Ивановиќ, Горан Илијевски, Исамедин Османи, Љубиша Аранѓеловиќ, Горан Стојменовиќ кои посмртно беа одликувани со „Медал за храброст“, а 37 припадници на безбедносните сили беа повредени.
По тој повод во Соборниот храм „Свети Никола“ во Куманово, денеска се одржа панихида за осумтте загинати припадници на полицијата кои учествуваа во вооружените престрелки во „Диво Насеље“ што се случија на 9 и 10 мај во 2015 година. Панихидата ја организираше група бранители од Куманово, а присуствуваше и министерот за внатрешни работи Наќе Чулев.
И кумановскиот градоначалник, Максим Димитриевски сподели видео на социјалните мрежи од „Диво Насеље“, истакнувајќи дека градот ќе продолжи да се развива, но и дека заслужува одговор што вистински се случи на 9 и 10 мај во 2015 година.
Во дводневните борби беа убиени десет припадници на косовска група, а 29 беа уапсени и им се суди за тероризам. Во населбата беа уништени 60-тина куќи во две улици, каде се криеја терористите.
Граѓаните на Куманово преживеаа два пеколни и неизвесни дена додека траеа борбите, но не подлегнаа на провокациите и го сочуваа соживотот во градот.