Со словенечка помош во вредност од 2,1 милиони евра ќе се реализираат пет инфраструктурни проекти во пет македонски општини. Тоа го овозможува Меморандумот за меѓународна развојна соработка за периодот 2023-2024 година што денеска го потпишаа вицепремиерот за европски прашања Бојан Маричиќ и вицепремиерката и министерка за надворешни и европски работи на Словенија, Тања Фајон врз основа на договорот за Развојна соработка потпишан уште во 2004 година.
Согласно Меморандумот, Владата на Словенија со 1,3 милиони евра ќе ја помогне изградбата на системот за прочистување на отпадни води во сливното подрачје на Дојранското Езеро, а со 225 илјади евра изградбата на хидроцентралата Б на браната Кнежево во општина Кратово чиј вкупен буџет изнесува 450 илјади евра. Со 224 илјади евра ќе ја помогне изградбата на системот за намалување на загубата на вода во општина Кочани чиј вкупен буџет изнесува 448 илјади евра, со 100 илјади евра ќе го кофинансира енергетското реновирање на зградата на градинката и ќе учествува во подигање на еколошката свест кај децата во општина Штип, а со 50 илјади евра ќе помогне во поставувањето соларни панели во општина Крива Паланка, проект вреден 100 илјади евра.
-Станува збор за проекти што ќе им донесат сериозни директни придобивки на граѓаните на овие пет македонски општини, но и на целата наша држава. Добрите искуства со подготовката и евалуацијата на проектите ќе се пренесат и во наредниот циклус. Уште на почетокот на 2024 година ќе започнеме со координација за нови проекти за следниот меморандум за разбирање кој ќе важи за 2025 и 2026 година, рече Маричиќ на прес-конференцијата во Владата по потпишувањето на Меморандумот.
Нагласи дека Република Словенија на овој начин влегува во врвот на билатералните донатори кон земјава.
-Покрај поддршката што ја добиваме од Словенија за инвестициските инфраструктурни проекти за нас многу важна е техничката поддршка во делот на процесот на интеграција со Европската Унија. За финансирање на овој вид активности ќе ни бидат ставени на располагање речиси 260 илјади евра. Нашите институции имаат одлична соработка со Центарот за европска перспектива, особено во областа на борбата против организираниот криминал и корупцијата што значително придонесува за транспонирање и имплементација на правото на ЕУ во рамките на важното поглавје 24 – Правда, слобода и безбедност, рече Маричиќ.
Покрај билатералната развојна соработка, како што додаде, имаме огромен потенцијал за соработка и во рамки на ИПА инструментите, како што се твининг и таекс. Исклучително значајни се и проектите за усогласување на националните системи со барањата на ЕУ за гранично управување. Словенија силно го поддржа и новиот пакет за проширување на ЕУ до 2030 година со земјите од Западен Балкан и секогаш во сите свои заложби на посебно место и како приоритет ја става земјава.
Словенечката министерка за надворешни работи нагласи дека Словенија е присутна тука со сите свои развојни институти со што, како што рече, јасно покажува колку многу се труди и во развојот и како партнери на Северна Македонија. Посочи дека посакува земјава да го продолжи европскиот пат и нагласи дека на следната меѓувладина конференција кога ќе се отвори првиот кластер на преговори, Словенија ќе ја понуди својата помош.
-Северна Македонија е една од најважните партнерки на Словенија. Ние веќе десетици години не само што помагаме за влез на Северна Македонија во ЕУ тоа го поддржуваме и со развојни проекти. Денеска го потпишавме петтиот меморандум, рече Фајон и додаде дека од 2010 година досега Словенија инвестирала повеќе од 43 милиони евра во земјава во проекти за заштита на животната средина.